𝗥𝗮’𝗶𝗶𝘀𝘂𝗹 𝗪𝗮𝘀𝗮𝗮𝗿𝗲 𝗫𝗮𝗺𝘀𝗮: “Waxa la farayaa dhammaan Hay’adaha 𝗶𝗻 𝗮𝘆 𝗯𝗶𝘅𝗶𝗻𝘁𝗮 𝗮𝗱𝗲𝗲𝗴𝘆𝗮𝗱𝗼𝗼𝗱𝗮 𝗸𝘂 𝘅𝗶𝗿𝗮𝗮𝗻 𝗔𝗾𝗼𝗼𝗻𝘀𝗶𝗴𝗮 𝗤𝗮𝗿𝗮𝗻𝗸𝗮”

Muqdisho, Isniin, 07 Abriil 2025: — Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta shir-guddoomiyey kulan heerkiisu sarreeyo oo looga hadlayey dhaqangelinta adeegsiga Aqoonsiga Qaranka, iyo isku-xirka Nidaamka Aqoonsiga Qaranka iyo adeegyada kala duwan ee ay bixiyaan hay’adaha dowladda iyo kuwa gaarka loo leeyahay, si loo dardargeliyo dhijitaalaynta iyo tayaynta adeegyada dadweynaha.

Ra’iisul Wasaaraha ayaa faray dhammaan hay’adaha ay khusayso in si buuxda loo dhaqangeliyo adeegsiga Aqoonsiga Qaranka, isaga oo xusay in kulanka ka dib la soo saarayo qaraar faahfaahinaya arrintan, una gogol-xaaraya adeegsiga buuxa ee Aqoonsiga Qaranka, kaas oo udub-dhexaad u ah dhaqangelinta Qorshaha Isbeddelka Qaran ee diiradda lagu saarayo casriyaynta iyo dhijitaalaynta adeegyada dowladda iyo kuwa ganacsiyada gaarka loo leeyahay.  

Wasiirka Arrimaha Gudaha, Dib-u-heshiisiinta, iyo Arrimaha Federaalka, Mudane Cali Yuusuf Cali (Cali Xoosh), oo kulanka ka hadlay ayaa isna faahfaahiyay muhiimadda ay leedahay isku-xirka Aqoonsiga Qaranka iyo adeegyada kala duwan ee dalka, isaga oo xusay in dhaqangelinta Nidaamka Aqoonsiga Qaranku uu wax badan ka tari doono geeddi-socodka dowladnimada iyo horumarka dalka.

Maareeyaha Guud ee NIRA, Mudane Cabdiweli Cali Cabdulle (Timacadde) oo isna shirka soo-jeedin qotadheer ka jeediyay ayaa sharraxay sida Kaarka Aqoonsiga Qaranka uu u yahay aalad lagama-maarmaan u ah sare u qaadidda hufnaanta adeegyada dowladda, dardargelinta dhijitaalaynta adeegyada kala duwan, xoojinta isla-xisaabtanka, iyo dhisidda kalsoonida dadweynuhu ku qabo hay’adaha dowladda.

Maareeyaha ayaa sidoo kale uga mahadceliyay Ra’iisul Wasaaraha Xukuumadda Federaalka Soomaaliya, Mudane Xamza Cabdi Barre, iyo Wasiirka Arrimaha Gudaha, Dib-u-heshiisiinta, iyo Arrimaha Federaalka, Mudane Cali Yuusuf Cali (Cali Xoosh), sida ay uga go’antahay dhaqan-gelinta Aqoonsiga Qaranka iyo garab is-taagga joogtada ah ee ay u muujiyaan Hay’adda NIRA.

DHAMMAAD