Tababar ku saabsan Farsamooyinka Hubinta Aqoonsiga.

Maareeyaha guud ee Hay’adda Aqoonsiga iyo Diwaangelinta Qaranka (NIRA), Mudane 𝗖𝗮𝗯𝗱𝗶𝘄𝗲𝗹𝗶 𝗖𝗮𝗹𝗶 𝗖𝗮𝗯𝗱𝘂𝗹𝗹𝗲 (𝗧𝗶𝗺𝗮𝗰𝗮𝗱𝗲) ayaa magaalada Nairobi ee Dalka Kenya ka furay tababar ku saabsan Farsamooyinka lagu Hubiyo Aqoonsiga.

Mudane Cabdiweli Cali Cabdulle, ayaa khudbaddiisa furitaanka ku sheegay in nidaamka Aqoonsiga Qaranka uu yahay laf-dhabarta la dagaallanka dambiyada xuduudaha iyo xoojinta amniga gudaha. Mareeyaha ayaa xusay in hay’addu ay ku jirto dadaallo muhiim ah oo lagu gaarsiinayo aqoonsiga rasmiga ah dhammaan muwaadiniinta Soomaaliyeed.

Munaasibadda furitaanka tababarka waxaa qeyb ka ahaa Safiirka Dowlada Norwey u fadhiya Dalka Kenya, Mudane 𝗚𝘂𝗻𝗻𝗮𝗿 𝗔𝗻𝗱𝗿𝗲𝗮𝘀 𝗛𝗼𝗹𝗺, Agaasimaha Guud ee Hay’adda Socdaalka iyo Jinsiyadda (HSJ), Mudane, 𝗠𝘂𝘀𝘁𝗮𝗳𝗲 𝗦𝗵𝗲𝗲𝗸𝗵 𝗖𝗮𝗹𝗶 𝗗𝗵𝘂𝘅𝘂𝗹𝗼𝘄, Taliyaha Hoggaanka Baarista Dembiyada Soomaliyada (CID) Mudane 𝗠𝘂𝘅𝗶𝘆𝗮𝗱𝗶𝗶𝗻 𝗔𝘅𝗺𝗲𝗱 𝗖𝘂𝘀𝗺𝗮𝗮𝗻 iyo Agaasimaha guud ee Socdaalka dowlada Kenya Mudane 𝗗𝗚 𝗘𝘃𝗲𝗹𝘆𝗻 𝗖𝗵𝗲𝗹𝘂𝗴𝗲𝘁.

Tababarkan ayaa ka mid ah dadaallada lagu xoojinayo iskaashiga dalalka gobolka si loo horumariyo hababka hubinta Aqoonsiga, loona dhiso awood sharciyeed si laysugu safro si nabada ah, iyadoo la adeegsanayo tiknoolojiyad casri ah iyo xirfado cusub oo sugan.