ISKU XIRKA KAARKA AQOONSIGA QARANKA IYO PASSPORT-KA DFS

𝗠𝘂𝗾𝗱𝗶𝘀𝗵𝗼– Waxaa maanta magaalada Muqdisho ka qabsoomay kulan muhiim ah oo u dhexeeyay Hay’adda Aqoonsiga iyo Diiwaangelinta Qaranka (NIRA) iyo Hay’adda Socdaalka iyo Jinsiyadda Soomaaliyeed, kaas oo looga hadlayay is-waafajinta adeegyada labada hay’adood iyo qorsheyaasha la xiriira adeegsiga Kaarka Aqoonsiga Qaranka.

Kulanka oo uu shir guddoomiyay Wasiirka Amniga Gudaha, 𝗖𝗮𝗯𝗱𝘂𝗹𝗹𝗮𝗮𝗵𝗶 𝗦𝗵𝗲𝗲𝗸𝗵 𝗜𝘀𝗺𝗮𝗮𝗰𝗶𝗶𝗹 (𝗙𝗮𝗿𝘁𝗮𝗮𝗴), waxaa qeyb ka ahaa:

• Wasiiru-Dowlaha Wasaaradda Arrimaha Dibadda, 𝗖𝗮𝗹𝗶 𝗠𝗮𝘅𝗮𝗺𝗲𝗱 𝗖𝘂𝗺𝗮𝗿 (𝗖𝗮𝗹𝗶 𝗕𝗮𝗹𝗰𝗮𝗱)

• Maareeyaha Hay’adda Aqoonsiga Qaranka (NIRA), 𝗖𝗮𝗯𝗱𝗶𝘄𝗮𝗹𝗶 𝗖𝗮𝗹𝗶 𝗖𝗮𝗯𝗱𝘂𝗹𝗹𝗲 (𝗧𝗶𝗺𝗮-𝗰𝗮𝗱𝗱𝗲)

• Agaasimaha Guud ee Hay’adda Socdaalka iyo Jinsiyadda, 𝗠𝘂𝘀𝘁𝗮𝗳 𝗗𝗵𝘂𝘅𝘂𝗹𝗼𝗼𝘄

• Howlwadeeno ka kala socday labada hay’adood.

𝗨𝗷𝗲𝗲𝗱𝗱𝗼𝗼𝘆𝗶𝗻𝗸𝗮 𝘂𝗴𝘂 𝘄𝗮𝗮𝘄𝗲𝘆𝗻 𝗲𝗲 𝗸𝘂𝗹𝗮𝗻𝗸𝗮 𝘄𝗮𝘅𝗮𝗮 𝗸𝗮 𝗺𝗶𝗱 𝗮𝗵𝗮𝗮:

• Hirgelinta isticmaalka Kaarka Aqoonsiga Qaranka ee qaadashada baasaboorka

• Dardargelinta aqoonsiga caalamiga ah ee Baasaboorka Soomaaliga

• Sugidda iyo tayeynta xogta muwaadiniinta Soomaaliyeed

• Xoojinta is-dhexgalka nidaamyada xog-wadaagga ee HSJ iyo NIRA

• Dhisidda hannaan joogto ah oo ay si wadajir ah u fuliyaan labada hay’adood

Intii uu socday kulanka, waxaa laysla meel dhigay in laga bilaabo:

𝟭-𝗱𝗮 𝗦𝗲𝗯𝘁𝗲𝗲𝗺𝗯𝗮𝗿 𝟮𝟬𝟮𝟱 dadka qaadanaya Baasaboorka waa in ay haystaan Kaarka Aqoonsiga Qaranka, si loo xaqiijiyo sugnaanta iyo kalsoonida xogta muwaadinka.

Sidoo kale, waxaa la go’aamiyay in laga bilaabo:

𝟭-𝗱𝗮 𝗝𝗮𝗻𝗮𝗮𝘆𝗼 𝟮𝟬𝟮𝟲 dhammaan socdaalka gudaha dalka lagu xiro isticmaalka Kaarka Aqoonsiga Qaranka, si loo hubiyo xogta shakhsiga ah ee muwaadiniinta.

Labada Hay'adood ayaa muddooyinkii u dambeeyay si wadajir ah uga shaqeynayay is-waafajinta adeegyada dowliga ah ee ay siiyaan dadweynaha, si muwaadiniinta loogu sahlo helitaanka xaquuqdooda dastuuriga ah.

Tallaabooyinkan ayaa qeyb ka ah dadaallada lagu mideynayo xogaha muwaadiniinta, laguna adkeynayo dhawrista xogta, ammaanka, iyo hufnaanta adeegyada dowladda.